Mentre "a vita se ne va

( Un testo stupendo per una meravigliosa canzone.
    I nonni restano sempre nei nostri cuori... )

Mentre ' a vita se ne va

Di Gigi D'Alessio

'E truove sempe a n'angulo assettate,
arravugliate dinte a nu vestito,
nu paro 'e scarpe miezo cunzumato
e nu rilorgio pe cuntà 'e minute,
vonno parlà e se scordano 'e  pparole,
sotto 'o cappiello fermano 'e pensiere,
ponno vulà…
Nisciuno cchiù se vede d' 'a famiglia,
guardano 'o munno areto a 'na fenesta,
sulo nu piatto 'ncopp'a 'na tuvaglia,
nu compleanno nun è cchiù 'na festa
nu poco 'e pane cu nu poco 'e latte,
è sempre chella 'a cena tutte 'e ssere,
ma pò bastà…

 Scenneno 'nzieme a' luce d' 'a matina,
cu nu surriso ca se leva a' sera,
lasciano 'e suonne 'ncopp'a nu cuscino,
mmischeno 'e ggocce dint’a nu bicchiere,
passano 'o tiempo dint’a ddo barbiere,
pecchè p' 'a casa nun 'e vvò nisciuno,
‘e mmane tremmano ma, no 'e paura.
Cu nu café se sporcano 'o cazone,
portano sempre 'mpietto 'na medaglia
i ‘e sorde 'e spiccie dint' 'o portafoglio,
cu chille 'e carta hanno crisciuto 'e figlie
e mmo so' sulo carte 'e caramelle…
Tanta nepute dint’’a nu ritratto
ma, 'e lloro cchiù nisciuno se ne fotte,
chi l'abbandona senza avè pietà,
dint’ a  'na casa addò se vede 'a vita
mentre se ne va…

Teneno sempe pronto nu cunziglio,
pe lloro simmo tutte quante figlie,
‘'o tiempo corre e chistu viento 'e spoglie,
lassanno 'e spine ma se porta 'e foglie,
'a vita stregna comme a 'na cravatta,
perdenno ll'urdema partita a carte,
ponno vulà…
Tutte 'e ddummeneche vanno dint' a' chiesa
cu 'na curona dinte 'e mmane 'nchiuse,
saglieno 'e scale pe gghì 'nParaviso
e a Ddio chiagnenno vanno a cercà scusa.
Cu ll'uocchie russe e 'o core cchiù affannate,
‘nfaccia 'na ruga pare 'na resata,
ma songhe 'e sfreggie ca te lassa 'a vita,
t'avvisa primma 'e dicere: “ È fernuta ! “.

Comme 'e ccriature aspettano Natale,
a ffine 'e mese aspettano 'a pensione,
tra veglie e suonne 'ncoppe a 'na panchina,
cumme cumpagne sulo nu bastone.
Pe lloro spisso arriva po' 'a luntano,
cocche signora ca se piglia cura,
ca pe denare 'e ssape accarezzà,
ma 'e vvote trovano chi è senza core
e nun tene pietà…
Cu 'e mmane hanno scavato 'e strade nostre
Ma, quanno n’hanno fatto e n’hanno viste,
ma 'o core lloro ormaje nun è cchiù tuoste,
cchiù gghiuorne passano e cchiù stanno triste.
Pe dint’’a ll'uocchie teneno nu velo,
ca sta scennenno comme a nu sipario.
Ll'urdema scena nun ‘a vonno fa’,
‘e vicchiarielle teneno paura
‘e se 'mparà a vulà…!

Rebus

Rebus

di Giulio Mendozza

Che canta a ffa' st' auciello 'int' a cajola
si canta sulo ma nun po' vula'?
'Sta voce sulitaria, sola sola,
nun è nu canto senza libertà!

E io cu' 'e vierze mieie che canto a ffa'
si 'e sbarre attuorno 'o core tu m' hê miso?
Io canto, forze, pe' pute' sunna'
ca chist' inferno è tutto paraviso!?!

(Giulio Mendozza, Stelle 'mpazzute, Volpicelli, Napoli)

'O nonno

'O Nonno
di Giulio Mendozza

‘O nonno nun è ‘o pate, ‘o nonno è ‘o nonno !
‘O nonno s’è scurdato ca era pate...
e a ce ll’arricurdà no ,nun ce ponno
‘e figlie che lle còceno ‘e ppaliate..

Era severo, rigido, scuntruso,
pretendeva rispetto e educazione;
si tu sgarrave, isso era furiuso,
s’arraggiava senza sentì raggione.

Ma che è succieso mo? Tutt’è cagnato !
Se squaglia p’’e nepute e ll’accarezza :
si nu criaturo chiagne o sta malato
se sbatte comm’’o pesce dint’â rezza.
Nun se fide ‘e sentì chilli lamiente,
chiammasse Cardarelli ‘a ll’atu munno..

Ê figlie lle diceva : «È cosa ‘e niente,
pe nu dulore, ‘a varca nun va a ‘nfunno»
Mo, invece, mamma mia, che agitazione :
vute, prumesse pe nu catarruccio;
ma cu ‘o criaturo ride e fa ‘o buffone :
« ‘O nonno t’ha purtato ‘o taralluccio !»

Si ‘a mamma e ‘o pate strillano ‘o criaturo,
isso s’arraggia ‘ncuorpo e se verdèa.
‘E chiavasse cu ‘a capa ‘nfacci’’o muro
o ‘e pigliasse ‘mparanza cu ‘a currèa,

Ê vvote sbotta, ê vvote ‘o ffa capì :
st’anema ‘e Dio è ‘a vita soja carnale.
E nn’odio piglia a cchi mo ‘o fa suffrì :
« Neh, stu criaturo ma che ha fatto ‘e male?»

E ‘o figlio: « Ma, papà, tu t’arricuorde
quanta buffe m’hê dato a ll’impruvviso ?
Me lassave ddoje ore ‘e rrecchie sorde
e m’abbuffave ‘e scemo e chiapp’’e mpiso !

E mmo ched’è ? ‘E tiempe so’ cagnate ?
Mo si’ ddoce, si’ tiennero e carnale !..
Sulo pe mme chianette e cutugnate ?
Sulo pe mme na faccia ‘e funnerale ?
‘ O nonno nun è ‘o pate, ‘o nonno è ‘o nonno !!!

Muglierema

Muglierema

Di Gennaro Sansone

Tu si' ‘nu personaggio, ‘na macchietta,
cu te me faccio sempe ‘na resata .
Accuminciammo d' ‘a matina ê sette…
Hê fatto ‘a spesa e po'… te l' hê scurdata…!

Tu puorte sempe ‘o ‘mbrello, si minaccia,
si cagna ‘o  tiempo e gghiesce, ‘o puorte mmane.
Subbeto ‘o ‘rape, comme fa ddoje gocce,
‘nu ‘mbrello quanno ‘a Porta Capuana…!

Te scanse a uno, cieche ‘n' uocchio a ‘n' ato ;
tiene ‘a capa ‘int' ‘e nnuvule, è accussi !
Si parle po', me pare ‘nu triatro,
quanno te guardo, tu me faje murì…!

Mo staje nervosa, mo ce ll'hai cu mmico,
pecché io dico ca tu si distratta,
però comme arrivammo ‘mpont' ‘o vico,
me dice: “ È overo ! Ma… accussì so' fatta…!

08/11/1997

Quanta buscie

Quanta buscie

di Gennaro Sansone

Che songhe ‘sti parole ‘e ggelusia,
si chistu core mio nun t'ha traruto !
Si sola tu si' stata ‘a vita mia,m
ma so' buscie ‘sti llacreme chiagnute !

E dilla ‘a verità, fatte curaggio,
d' ammore nun è muorte maje nisciuno !
È dispiacere ma, nun è rrammaggio,
si ‘e verità ‘a ‘sta vocca nun ne jesce una…

P'avvelenarme ‘a vita a poco a poco,
sole buscie chiene ‘e ‘nfamità .
‘O core ‘e n'ommo , no, nun è ‘nu juoco !
Nun dicere cchiù niente, nun parlà…!

Mille prumesse e io t'aggio creduto,
mille capricce e io te perdunave .
Tu, bene overo nun me n' hê vuluto,
si po' tantu vveleno m' astipave…!

P'avvelenarme ‘a vita a poco a poco,
sole buscie chiene ‘e ‘nfamità .
‘O core ‘e n'ommo , no, nun è ‘nu juoco !
Nun dicere cchiù niente, nun parlà…!

'A matenata

'A matenata

 di Ferdinando Russo

T’ aggia cantà 'na bella « matenata »
lucente ‘e sole e 'mprufumata ‘e sciure,
sentimentale, doce e appassiunata,
e voglio essere ‘o Rre d’ ‘e cantature.

E tu, cu l’ uocchie ancora chine ‘e suonne,
te suse e caccie ‘a capa pe’ vedé...
E abbaglie ‘o sole cu sti trezze jonne,
comme  l’ ammore tuio m’ abbaglia a me !

Alzhaimer

 Alzhaimer

Di Ciro Iannone

Quanti ricorde perze
dint' a niente,
comme 'na porta
sbatte dint' o' viento,
all'improvviso tutto
è cancellato,
'na vita senza storia
e senza nu passato.
Povera vicchiarella,
nun ha tenuto ciorta,
che brutta fine ha fatto,
e comme s' è ridotta,
 'ncopp' a 'na seggia 'na jurnata sana,
vide ca se cunsuma chiano chiano.
Te guarda cu
chill'uocchie ca cercano pietà
e tu te danne e 'o saie,
ca nun 'a può aiutà,
lle passe doce
 'a mano 'int' 'e capille
e 'o core 'mpietto se
fa nu murzillo.
Nuttate longhe,
appuiato a piede 'o lietto,
te da 'o calore favezo,
sultanato 'na coperta.
'O ssaie ca staie
facenne 'na battaglia,
ma all'urdeme già
saie ca pierde 'a guerra.
'A mmèricina nun
serve quasi a niente,
sultanto a prolungà
chistu turmiento,
pienze chi sa' si
arriverà a dimane,
l'astrigne forte
'mpietto, e po' le' vase 'e mmane.
'A vide ca sta
meglio,'o saie ca te lusinghe,
 e vaie truvanne, ca 'o miedeco te dice ca forse
se repiglia
 ma, è chello ca vuò sentere, e ce rimane male,
quanno chesta
risposta nun t'arriva.
'N'arraggio forte se
scatena 'ncuorpo,
po' guarde 'ncapo o'
lietto addò ce sta 'a Madonna,
 'ncazzato le faie 'a solita domanda;
 ma che peccato ha fatto, 'sta povera Sant'Anna?
E' comme è 'nfame
chesta malatia,
cancella ammore, e
tutte 'e sentimente,
è 'a collera cchiù
grossa ca te piglie,
quanno 'na mamma...
nun cunosce 'e figlie.

Ciro Iannone 2014

Pe n'ata vota... 'o sole...

Pe n’ata vota… ‘o sole...

di Nazario Bruno

‘O tiempo quanno passa,
 se porta tanti ccose..
 sulo ‘e ricorde lassa,
 dint’a n’addore ‘e rose..

Ê vvote, stu prufummo
 te torna dint’ô core
 ma pesa comm’a chiummo,
 te fa sentì dulore.

T’accuorge, all’improvviso,
 ca tutto s’è cagnato,
 stu surzo ‘e Paraviso
 amaro è addiventato.

‘A vita fa prumesse,
 ma so’ sulo parole..
 e i’ guardà vulesse,
 pe n’ata vota, ‘o sole !

M a ‘o vierno ‘e ll’esistenza
 nun tene primmavera
 e se nne va ‘a speranza
 doppo ca è scesa ‘a sera…

'E ccerase

‘E ccerase

 di Federico Carducci

Comme traseva Maggio, ogne matina
 'na vicchiarella jeva p’ ’o mercato
 e ‘ncopp’ô meglio puosto, ‘o cchiù accurzato,
 cu mano lesta , trasparente e ffina,
 pe' mmiez’a ttanta frutte ‘nterra spase,
 se sciglieva 'nu scampulo ‘e cerase.

S’  ’a guardava priata ‘a vicchiarella,
 rossa e llucente, 'sta grandezza ‘e Dio;
 s’  ’a guardava ‘ncantata pe' gulìo
 e lle redeva ‘a faccia ‘ncrespatella…
 ‘A gente che sparlava cu malizia,
 murmuliava : --- Che cannarutizia !!

Guarda 'sta vecchia, tutta arrepezzata,
 more si 'sti cerase nun ‘e pprova !!
 Apposta ‘e s’accattà 'nu paro d’ova,
 che Dio ‘o sape comme sta malata,
 nun passa juorno, ‘a che Maggio trase
 che corre lloco a s’accattà ‘e cerase !—

E ‘a gente murmuliava..ma ‘un sapeva
 che ‘e cerase piacevano a Taniello,
‘o figlio ‘e mamma, ‘o core ‘e mamma bello..
 E mamma soja sempe ‘nc’ ’e pruvedeva
 pecchè Taniello sujo, pe' ddoje cerase,
 lle deva tante e ttante..tanta vase…

Ma po'  'stu figlio, bello comm’ô sole,
 jette ‘nguerra e mmurette, e allora.. Niente !
 che si nce sta 'nu Dio gruosso e pputente,
 che ponno dì…che ponno dì ‘e pparole ?
 E ‘a mamma, pe' ricordo ‘e chilli vase,
 se ll’accattava sempe ‘sti cerase,

‘e sistimava dint’a 'na fruttiera,
‘ncopp’ ’a tavula, bella e apparicchiata,
 po' s’assettava ‘mmocc’â ‘ntelarata
 e, murmurianno ‘a soleta prighiera,
 aspettava..aspettava a Taniello,
‘o figlio sujo, ‘o core ‘e mamma bello..

Quanno murette ( cu salute a vvuje )
 nun appena trasette ‘mParaviso
 cu quacche cosa ‘int’ ’e bbraccia miso,
 vedette, finalmente, ‘o figlio sujo
 mmiez’ ’e nuvole d’oro attuorno spase…
--- Taniè ! Mamma t’ ha purtato ‘e ccerase !

E ss’assettaje, accosta accosta ô sole,
 cu ‘o figlio sujo vicino e allora… Niente !
 Che si nce sta  'nu Dio buono e pputente,
 che ponno dì…che ponno dì ‘e pparole ?
 Mamma e ffiglio, magnannose ‘e ccerase..
 quanta vase !...ma quanta e quanta vase !!

Porta Capuana

Porta Capuana

 di  Ettore De Mura

Comm’ire bella e ccomm’ire squarciona,
 oje piazza antica ‘e Porta Capuana
 ca tte ricuorde ‘e tiempe d’Aragona
 e ffuste ‘a piazza cchiù napulitana!

 Fino a vvint’anne fa,steveno ancora
‘e puoste ‘e pisciavinnele a ffilera
 e ddint’’e cceste ce vedive, allora,
‘e panette cu ‘e passe e c’’a bannera.

D’’a frutta se senteva già ‘o sapore
 vedennela accunciata int’’e ppanare,
 attuorno attuorno se mmiscava ‘addore,
 chill’ addore ‘e campagna ‘e d’erba ‘e mare.

‘E mmummere cu ll’acqua dint’’e ttine
 p’’e ffa ffà fredde nzieme cu ‘e limone.
 Tavule e vvotte pe ffor’’e ccantine,
 spassatiempo, tunninule e ccanzone.

‘O pazzariello, ‘o prevete, ‘a maesta,
‘o scugnizzo, ‘a bizzoca, ‘o cammurrista;
 na folla ca pareva sempe ‘nfesta..
 na folla che a gguardà, sazziava ‘a vista!

 Carrette chien’’e ffrasche e sciaraballe,
 pianine, cuncertine e bbancarelle,
 sciure e ttammorre, cozzeche e ttaralle,
 uommene cu’e mustacce e nnenne bbelle..

 Comm’ire bella e cquant’ire squarciona,
 oje piazza antica ‘e Porta Capuana!!
 T’he purtato cu tte ll’epuca bbona,
 ll’epuca bella : ‘a cchiù napulitana!!

Na poesia

Na poesia

di Nazario Bruno

T’aggio sunnata, bbella comm’âllora,
 cu ll’uocchie tuoje, lucente e annammurate ...
 M’hê accarezzato, senza na parola,
 e appassiunatamente, mm’hê guardato ...

E sso’ tturnato arreto ’e quarant’anne,
 all’improvviso, comme pe mmagìa,
 e sso’ scumparze tutte chist’affanne
 che ffanno triste chesta vita mia.

Aggio sentuto, forte, dint’ô core,
’o stess’ammore ’e tantu tiempo fa,
 quann’ ’o silenzio ... e nu tramonto d’oro
 ce rïalavano ’a felicità ...

Ma ’o tiempo passa e sfronna tutt’ ’e ccose,
 senza pietà ... nun guarda nfaccia a nniente;
 annant’ô tiempo, songo comm’ ’e rrose,
 ll’ammore, ’o bbene e ttutt’ ’e sentimente ...

E cchist’ammore nuosto s’è pperduto
 doppo tant’anne, doppo tanta vita,
’o bbene ... ’o mmale ... tanto n’âmm’avuto,
 ma pure ’a rosa nosta s’è appassita ...

Eppure, dint’ô suonno, mm’hê guardato
 senza rancore, cu mmalincunia,
 e, ccomme si mm’avisse perdunato,
 mm’hê addimannato sulo na poesia ...

Me so’ scetato ... nziem’a nu dulore
 pe ttutto chello ca nun ce sta cchiù,
 ma, doce, m’è rrummaso nu sapore,
 ch'è nu sapore antico ... ’e ggiuventù ...

'O 'mpignatore

'O 'mpignatore

di  Edoardo Nicolardi

All’otto, ‘mponta ‘o vìculo,
tunno, sazio e cuntento,
cu nu bastone d’ebano
c’ ‘o màneco d’argiento,
e ‘o mazzo ‘e chiave ‘mmano,
sponta don Bastiano.
All’otto, comme ‘o ssoleto,
scenne ‘arapì ‘Aggenzia.
(So’ catenacce strèvoze,
chiusure a simetrìa
ca surtant’isso ‘e ssape).
Se guarda attuorno, e arape.
Po’ appiccia ‘a lampa elettrica
nnante a nu San Gaitano;
posa ‘o bastone a n’àngolo,
se leva ‘e cchiave ‘a mano,
s’allumma ‘a sicarretta,
po’ se fa ‘a croce, e aspetta...
E aspetta. E accussì passano
ll’ore: ma che lle mporta?
Gatta ca mposta ‘o sòrece,
stà ll’ore areto ‘a porta;
Chi ha dda venì, nun manca!
nun sposta e nun se stanca.
E vene: mo’ è nu giovane,
cchiù appriesso è n’ommo anziano,
cchiù a ttarde po’ è na femmena
cu na mappata mmano...
(Cchiù d’uno tene intanto
ll’uocchie arrussate ‘e chianto).
« Ngraziammo a Dio, ca vèneno! »
(fa isso, sottavoce).
Po’ leva ‘o ppoco ‘e pòvere,
po’ se fa n’ata croce,
e, cu na cera storta,
se mposta ‘a reto ‘a porta.

Nannina

Napulitanata. ( Nannina )
 Versi di Salvatore Di Giacomo - Musica di P. M. Costa - 1884 -

Uocchie de suonno, nire, appassiunate,
 ca de lu mmele la ducezza avite,
 pecché, cu sti gguardate ca facite,
 vuje nu vrasiero mpietto m'appicciate?

 Ve manca la parola e mme parlate,
 pare ca senza lacreme chiagnite,
 de sta faccella janca anema site,
 uocchie belle, uocchie doce, uocchie affatate!

Vuje, ca nziemme a li sciure v'arapite
 e nzieme cu li sciure ve nzerrate,
 sciure de passione mme parite.

Vuje, sentimento de li nnamurate,
 mm'avite fatto male e lu sapite,
 uocchie de suonno, nire, appassiunate.

Vurria...

VURRIA…

Di Salvatore Di Giacomo


Vurria c’ uno, ’int’ o suonno, me pugnesse

cu n’ aco mmelenato:

doce doce accussì mme ne muresse,

senz’ essere scetato,

senza sentì e vedé…

Ma… nn’ ’o vurria sapé…

Nu miedico vurria ca mme dicesse:

“Tu staie buono malato!”

E ca pe mmedicina acqua mme desse,

e sanato, e ngannato

io vurria rummané…

Ma… nn’ ’o vurria sapé.

Vurria c’a n’ato mo te truvasse,

a n’ ato nnammurato:

ca felice e cuntenta tu campasse,

e d’ ’o tiempo passato

te scurdasse, e de me…

Ma… nn’ ’o vurria sapé!

(da Ariette e Sunette)

Tramonto

Tramonto

di Giulio Mendozza

**
So’ sghizze d’arance sanguegne
pe mmiez’a stu cielo ‘e tramonto
e tutt’’a cullina se regne,
spicchiannese ‘nfaccia â città.
**
Na vela straluce p’’o mare
e ‘o gghianco se tegne ‘e culore;
so’ russe, so' vverde, so’ cchiare
mmescate ‘e celeste e de bblu.
**
Sta rena so’ pietre preziose;
rubine, diamante, ametiste,
lucente si cchiù songo ‘nfose
‘a st’onna ca vene e che va..
**
Pe ll’aria vola mo na sinfunia
che ‘ncanta, che stona e sturdisce.
M’accide , però, ‘a nustalgia
e ancora i’ nun saccio ‘o pecchè!!

Tramonto

Tramonto

di Romano Rizzo

Nu raggio ‘e sole sciulia ncopp’a ll’onne
ca se so’ fatte rosse comm’’o ffuoco,
mentre ca ‘o sole a mare s’annasconne
e se ne scenne nfunno a poco a poco.

‘O cielo avvia a piglià mo sfumature
ca nisciuno pittore ‘e po’ maje fà;
se mmescano ‘ntra lloro sti culure
ca ogne mumento tu vide ‘e cagnà.

‘O viento, bell’e buono, s’è fermato
e i’ sto nchiuvato , senza riciatà;
pare ca tutt’’o munno s’è ncantato
annanze a stu spettaculo d’està.

Luntano assaje, veco ‘e passà na vela..
Dint''o silenzio canta sta riviera...
Ma ’o sanghe dint’’e vvene me se gela
veco ca scenne già ll’ombra d’’a sera!

Suonno 'e Pasca

Di Rosanna Bazzano

Suonno  ’e Pasca

Si a chist’ammore disse na speranza
tenesse n’ at’addore ’stu ciardino,
ce semmenasse  ’e vviole cu abbundanza
pe mmiez’ ’e rrose e mmiez’ ’o giesummino.

Na viola ‘e Pasca te purtasse nzino
e tu me disse n’uovo ‘e ciucculata,
io  t’abbracciasse pe te stà vicino,
tu me vasasse ’a vocca nzuccarata.

E ce scetasse  ’o  sole da matina,
e c’addurmesse  ’o suono  ’e na  campana…
ma mentre Pasca se fa cchiù vicina
’sta fantasia  cchiù me se fa luntana….

- Prospera Paturnia
( Rosanna Bazzano)

Traduzione

Se daresti a quest'amore una speranza
avrebbe un altro odore il mio giardino,
vi seminerei viole in abbondanza
miste alle rose e miste al gelsomino.

Una viola di Pasqua ti porrei sul petto
tu mi daresti un uovo di cioccolata
per starti accanto ti abbraccerei più stretto
tu baceresti la bocca zuccherata.

Ci sveglierebbe il sole alla mattina
e ci addormenterebbe il suono di campana…
ma mentre Pasqua si fa più vicina
questa speranza si fà più lontana.

Trad.:  Rosanna Bazzano

Rose rosse

Rose rosse

 di Antonino Alonge

Erano comm’ ’e rrose
 ll’anne d’ ’a giuvinezza;
 erano comme fosse
 'nu fascio ‘e rose rosse
 ancora mmeze ‘nfose
 che addorano ‘e frischezza.

Passajeno comme  a quanno
 a 'na cert’ora ‘o sole
 tramonta e tutt’ ’o ffuoco
 se perde a ppoco a ppoco
 e ‘o cielo va piglianno
‘a tinta d’ ’e vvïole…

Ma ‘o ffuoco d’ ’e gghiurnate
 d’ ’a giuventù, addò sta ?
'Na vota ca tramonta
 nun sponta cchiù e si sponta
 po’ riturna pe ll’ate,
 p’ ’e giuvene, si ssa.

Ma no pe' chi ha passato
 ll’anne d’ ’a giuventù,
 che erano comme fosse
 'nu fascio ‘e rose rosse
 che, quanno so’ seccate,
 nun addorano cchiù..

'Na schiuppata 'e rose

'Na schiuppata ‘e rose

 di Romano Rizzo

Cchiù ffresca e ddoce ‘e na schiuppata ‘e rrose
 trasiste tu, na sera, ‘int’a stu core,
 che, tanno, se scurdaje nu sacco ‘e ccose
 ma se mparaje che vene a ddì ll’ammore.

C’’o primmo ventariello ‘e Primmavera,
 liggiero comme fosse na carezza,
 accuosto a mme veniste, a primma sera
 e ‘o core mio mpazzette p’allerezza !!

Po, comm’a nu palummo nnammurato
 i’ girave e avutave attuorno a tte,
 ca ire bella, gentile e ddilicata
 ma ca, ‘e sicuro, nun penzave a mme.

Vocca ‘e curallo, uocchie appassiunate,
 meglio ‘e na bambulella ‘e bisquit...
 appena i’ te vedette, aggio sperato
 ca tu nu juorno me dicisse si’.

E m’arricordo che na sera ‘e Maggio,
 i’ m’ero perzo a sti bell’uocchie ‘nfunno
 e ‘a luna ‘ncielo me dette ‘o curaggio..
 e ffuje ‘o cchiù felice ommo ‘ncopp’ô munno.

‘A tanno, tantu tiempo già è passato..
 senza che maje venesse na tempesta...
 pe chistu core, troppo nnammurato,
‘a vita fuje sempe vestuta a ffesta.

Ogge tu pare a mme cchiù bella ancora
 quanno surride cu nu musso astrinto;
 certo ‘e ll’ammore mo è passata ll’ora,
 ma i’ te ssaccio tu... si’ bella ‘a dinto.

N’ammore che è ‘mpastato cu ‘a ducezza
 è ‘o sentimento che mo provo pe tte..
 aunite assieme bbene e ttennerezza
 i’ sento schiuppà ssempe ‘mpietto a mme !

È n’ato ‘o nomme, diverzo è ‘o sapore
 ma a vvedè buono è ssempe chill’ammore,
 che veneva sempe primma ‘e tutte ccose
 e era cchiù ddoce ‘e na schiuppata ‘e rrose !

Femmene e rose

FEMMENE  E  ROSE

Di Pasquale Ruocco

Femmene belle d’ ‘e canzone antiche,
ve sento n’ata vota suspirà,
mentre spontano ‘e stelle e dint’ ‘e viche,
‘e cuncertine tornano a cantà.

So’ fatte ‘e sciure, lacreme e suspire
chesti canzone ‘e n’ata giuventù:
Carulina, cu ll’uocchie nire nire,
fra cielo e mare nun s’affaccia cchiù.

Erano ‘e rrose ‘e ‘nu ciardino allero
‘sti ‘nnammurate ‘e tantu tiempo fa:
e mo pecché Carmela ‘e San Sivero
nun passa cchiù p’ ‘e vvie d’ ‘a Sanità?

‘E manduline tremmano scuntente,
‘a luna saglie lenta: e i’ penzo a te,
palomma malinconica e lucente,
Maria, ca t’addurmive ‘mbraccia a me.

Tutto chello ca ride ncopp”o munno
scenne ‘int’a ll’ombra e nun po’ cchiù turnà…
Dimme, addò vanno ‘e ffronne ‘int’a ll’autunno,
dimme, addò vanno ‘e nuvole d’està!