Storia antica

STORIA ANTICA

di Claudio Pennino

**
Tant’anne fa, ma chesta è storia antica,
dduie ggiuvene muretteno p’ammore.
Strazziate d’ ’a gnuranza e d’ ’a fatica,
seccaieno comme pò seccà nu sciore.
**
Maletrattate a nomme ’e na murale,
doppo ca fuieno 'nvita cuntrastate,
vicine, pe remmedio a tantu mmale,
venetteno atterrate e pò scurdate.
**
Ccà ce nascette n’arbero ’e cerase,
cchiù llà n’arbero ’e mele rosse e ttonne;
e quanno maggio vott’ ’a porta e ttrase,
ll’ammore, ancora mo, fa tremmà ’e ffronne.
**
E si p’ ’o cielo ’a luna è cchiù splennente,
comm’a nu suonno tiennero e ncantato,
’e nnammurate, appassiunatamente,
se votteno ’int’ ’e bbracce una cu ll’ato.
**
Nu triemmolo serpéa p’ogne frunnella,
ll’ammore ’e cchiamme, va truvanno ’e vase…
allora, isso ’a riala na melella,
e, essa, lle riala ddoie cerase.
**
(da Acqua salata, 2019)

***************

Traduzione letterale, non poetica

Storia antica

Di Claudio Pennino

Tanti anni fa, ma questa è una storia antica,
due giovani morirono per amore.
Straziati dall'ignoranza e dalla sofferenza,
sì spensero come può spegnersi un fiore.

Maltrattati  in nome di una morale,
dopo che furono contrastati in vita,
vicino, per rimediare a tanta cattiveria,
vennero interrati e lì dimenticati.

Qui nacque un albero di ciliegie,
più in là un albero di mele rosse e tonde;
e quando maggio bussa alla porta ed entra,
l'amore, ancora adesso, fa tremare le foglie.

E se in cielo la luna è più splendente,
come un suono tenero e incantato,
gli innamorati, appassionatamente,
sì buttano uno nelle braccia dell'altro.

Un tremore serpeggia per ogni fogliolina,
l'amore li chiama, vuole i loro baci...
allora, lui le regala una piccola mela,
e, lei, gli regala due ciliegie...