Ll'alba

Ll’alba

di Romano Rizzo

**
Tutt’è silenzio attuorno, tutto è pace,
chest’è, â matina, ll’ora che me piace :
è ll’ora ‘e quanno llibbero te siente
e ‘e ll’ata ggente, nun te ‘mporta niente.
**
Cagna culore ‘o cielo, ogne mumento,
‘o guarde tu cu ‘o core assaje cuntento;
sulo cammine... cu nisciuno attuorno
e vuò vedè comm’è ca schiara juorno.
**
Ll’onne d’’o mare fanno nu merletto
mentre cchiù doce sta sciuscianno ‘o viento,
‘o cielo sta pruvannose ‘o bbelletto
e ‘a scumma ‘e ll’onne pare fatta ‘argiento.
**
St’aria rusecarella, doce doce,
‘ncore te mette na voglia ‘e cantà
e si ‘a lluntano siente tu na voce,
appriesso a essa ‘o core se nne va.
**
È ll’alba... n’atu juorno sta nascenno,
tanti speranze sceta dint’’o core..
cchiù tarde, quann’‘a sera sta scennenno...
te llassa sta speranza e se nne more !!