'O viento

‘O viento

di Ernesto Murolo

**
Pe mare, na dummeneca d’estate,
cu ‘o cuttariello ‘ncalma, sott’’o sole..
Ll’aria è accussì pesante,
ca si parle, te stancano ‘e pparole.
**
Na cupola celeste e trasparente
me pare ‘o cielo ‘e Napule
e se perde, luntano, senza fine.
**
Aunite e sparpagliate
pe Proceta, Pusilleco, Surriento,
chesti vvele latine,
arze ‘e calore e stanche,
nchiummate a mare, senza n’ombra ‘e viento,
pareno tanti... ppalummelle janche
appezzate ogneduna cu na spingula...
**
Che pace ! Che silenzio !
Stiso ‘ncuperta, ‘e spalle e ‘o pietto ‘a fore,
penzo surtanto ca… nun penzo a niente...
Nu vuzzo ‘e piscatore
voca nnanz’a Donn’Anna,
sott’a nu sole ardente..
( Sbatteno ‘e terzarule lentamente
nfaccia a sti vvele ‘npanna...)
**
A temone ‘o cchiù viecchio marenare,
cu ‘a cicca mmocca, meglio d’’o fumà,
mo guarda a mare, mo dà n’uocchio a riva,
mo mbusumèa cu ‘o viento,
pecchè, p’’a gente ‘e mare,
‘o viento è comm’a na perzona viva :
ne sanno ‘a voce, ‘e mmosse, ‘o tradimento ;
ne sanno ‘e bbon’azione e ‘a ‘nfamità …
**
Ogge è cchiù nfamo e dispettuso ancora :
Aggio avuto sta sciorta !
e che cuntrora !
Che cuntrora schiattosa !
Che calma eterna ncopp’a st’acqua morta !
Nce nfonno ‘a mano e quase nun s’è nfosa—
**
St’addore ‘e fune ‘e buordo e de lignamme,
vernice, « piccepaino »,
stu senzo ‘e salimastro e de catramme,
ca, quanno nun c’è viento, cchiù se sente,
me trase ‘int’’e ccervelle, acutamente..
Tengo n’arzura ‘nganna...
( Sbatteno ‘e terzarule lentamente
nfaccia a sti vvele ‘npanna...)
**
Ma, a nu mumento a n’ato,
llà... fore Capre... ancora cchiù luntano,
na macchiulella blu,
ma accussì blu ca pare quase nera,
se stenne ncopp’a ll’acqua...
 È n’ombra. È niente,
te pienze tu ;
ma, ll’ommo ‘e mare, fisso,
cu ll’uocchio afflussiunato,
già, primm’’e te, l’ha visto, ‘o sape, ‘o sente :
zitto ca è isso… è ‘o viento...
**
‘O vì lloco… ’O vì lloco...
Réfola ca s’accosta chianu chiano,
se fa desiderà.
Pare comm’a na femmena,
ca se ciancèa nu poco
primma ‘e se fa’ vasà...
**
Po, ‘a macchia blu se spanne ; e mo so tante
ca ncrucéano mmiez’’o golfo ‘e Napule..
‘O mare, fino a mo, janco, abbagliante,
sott’’o sole ‘e fuoco,
cagna culore ; mo è turchino ardesia...
nu velluto turchino ardesia..’O vì lloco...
‘Npruvvisamente,
comme schezze chiasse appena appena,
pare ca mille e lille àcene ‘e rena,
attuorne a nuje, chioveno a mare e ‘o pogneno,
‘o stuzzecano, ‘o smoveno..
**
Agguanta ‘a scotta...  Forza...
Ll’arberatura schioppa... ‘E vvele sbanneno,
ruciulèa sottaviento nu binocolo...
‘O cottero va « orza»...
Nu poco ancora... N’atu ppoco ancora...
Pare ca affonna, pare,
cu ‘a murata ‘int’a ll’acqua e  ‘a chiglia ‘a fore...
Che viento frisco !
...E quant’è bello, ‘o mare
ca fragne a poppa e sciacquettèa p’’a prora...