Nun è overo

Le mille facce di Napoli

NUN E' OVERO

 di Pasquale Ruocco

 No, nun ‘e state a sentere ‘e canzone!
 Chistu mare è celeste, 'o cielo è d'oro,
 ma 'stu paese nun è sempe allero.

 Nun sponta sempe ‘a luna a Marechiaro
 e nun se canta e se fa sempe amore;
 cheste so’ fantasie p' 'e furastiere.

 Si vuie vulite bene a 'stu paese,
 fermateve 'nu poco dint’ ’e viche,
 guardate dint' ’e vasce e fore e' chiese.

 Venite, assieme a me, p’ ’e strate antiche,
 invece ‘e cammenà vicino o' mare,
 parlate cu chi soffre e chi fatica.

 Quanta malincunia p’ ’e case scure
 addò nun trase st aria 'e primavera!
 Guardate quanta sante attuorno 'e mmura!

 'Sta gente puverella crede a Dio,
 patisce rassegnata e pare allera:
 e chi è cecato canta "O sole mio".

 N'hanno chiagnute lacreme ll'artiste:
 e quante ne so' muorte int' o' spitale!
 'Stu paese d' 'o sole comme è triste!

 Io veco comm’ a n'ombra a ogne puntone
 e penzo 'a gente ca lle manca 'o ppane…
Quanta buscie ca diceno 'e canzone...!