Maggio

Maggio

di Ferdinando Russo

Mese d’ ’e rrose! Maggio è ‘o meglio mese !
Mettimmo ‘e perziane 'nnanz’ ê ccase !...
‘O sole va currenno p’ ’o paese,
arriva ampressa e ttarde se ne trase...

Dint’ a ll’ uocchie d’ ’e femmene cianciose
mette 'na luce che s’ arrobba ‘e squase.
Scenne ‘nciardino e s’ accarezza ‘e rrose,
sceta 'int’ ’e core ‘o desiderio ‘e vase.

Ll’ uocchie nire o celeste, apierte o ‘nchiuse,
mannaggia !, m’ ’e vasasse pe 'nu mese !
Me ne jesse alluccanno p’ ’o paese :
'Nu sordo ‘a schiocca ! all’uso d’ ’e cerase !

Po' me fermasse ‘o vico ‘o Paraviso,
addò saccio ca Briggeta sta ‘e casa.
Che uocchie ‘e velluto tene chella ‘mpesa !
Che fussetelle, si fa ‘o pizzo a rriso !

‘O pate è 'nu cucchiere ‘ntussecuso
e me pare ca serve a 'nu Marchese..
Porta ‘o tubbo e ‘o soprabbeto priciso
e ‘a barba fatta..ma lle fete ‘o naso !

Embè..si me dicesse quacche offesa ?
e si facesse troppo ll’acciaccuso ?
Me voglio spusà ‘a figlia… Nun è cosa ?
Si po m’ ’a fujo, ‘o faccio persuaso ?