di Alfredo Gargiulo
Comme so’ belle ‘e stelle,
comme so’ belle ‘e rrose,
ma ‘a femmena è cchiù bella,
cchiù bella ‘e tutte ‘e ccose.
Si nun ce sta na femmena
ca è pronta a ce vasà,
cu cchi facimmo ammore,...
che ce campammo a ffà?
Si a n’ati dduje o tre secule
stu munno ha dda fernì,
mbraccia a na bella femmena
stu core vo’ murì!
Trezze carnale e nnere,
vucchelle ‘e calamita,
vuje site ‘a primmavera,
‘o zuccaro d’’a vita.
Si dint’â luna ‘e femmene
se ghiessero a ‘nzerrà,
i’ pure, ncopp’â luna,
curresse p’’e vasà!
Curaggio, mo dicimmola
sta grande verità,
senza manco na femmena
ll’ommo..nun po’ campà!!
