di Romano Rizzo
Nu raggio ‘e sole sciulia ncopp’a ll’onne
ca se so’ fatte rosse comm’’o ffuoco,
mentre ca ‘o sole a mare s’annasconne
e se ne scenne nfunno a poco a poco.
‘O cielo avvia a piglià mo sfumature
ca nisciuno pittore ‘e po’ maje fà;
se mmescano ‘ntra lloro sti culure
ca ogne mumento tu vide ‘e cagnà.
‘O viento, bell’e buono, s’è fermato
e i’ sto nchiuvato , senza riciatà;
pare ca tutt’’o munno s’è ncantato
annanze a stu spettaculo d’està.
Luntano assaje, veco ‘e passà na vela..
Dint''o silenzio canta sta riviera...
Ma ’o sanghe dint’’e vvene me se gela
veco ca scenne già ll’ombra d’’a sera!
Nessun commento:
Posta un commento