Di Nazario Bruno
A carta e ’a penna ... ’e ttengo dint’ê mmane ...
ma dint’ ô core ... cchiù nun tengo niente ...
e cchistu foglio ... jànco ... oggi rummane,
ca ll’aggio cunzumate, ’e sentimente ...
Che scrivo? Pecché scrivo? Ma ... a cche vvale!
’A tantu tiempo scrivo, inutilmente!
È overo ca nun faccio niente ’e male
ma ... che lle mporta ’e me a ttutt’ ’a ggente?
Ognuno ’e nuje nne téne tante ’e guaje
e studia tutt’ ’a vita p’ ’e scansà;
ncopp’a ’stu munno nce nne stanno assaje ...
figùrate, d’ ’e mieje, che nn’hann’ ’a ffa’!
Si scrivo che ll’ammore mm’ha lassato ...
saje a qquante ll’è succieso, primma ’e me!
Si scrivo ca mme songo annammurato ...
che se nne mporta, ’a ggente, d’ ’o ssapè!
E si mme chiagno ’o tiempo ch’è ppassato ...
mme guardo âttuorno ... quanta viecchie, ahimé!
Si stongo allero, si sto’ ddisperato,
nisciuno m’addimanna: « Neh ... pecché?»
Si guardo ’o cielo, ’e notte, e bbeco ’a luna ...
saje a qquanta parte ’e munno ’o ppônno fa’!
Songo miliarde, ’e stelle, pe ffurtuna;
ognuno ’e nuje nne têne, p’ ’e ccuntà!
Ogni ppenziero, ogni ssensazzione,
no, nun sarranno màje na nuvità;
nu suonno nuovo, na nuova emozzione,
diciteme: chi maje ’e ppo nventà?
Eppure tengo ciento ... mille frate
ca so’ ttutte patute comm’a mme
e ppassano, c’ ’o sscrivere, ’e gghiurnate
senza sapè nè ’o ccomme nè ’o ppecché.
E a cchisti frate i’ dico: « ’A vita è avara,
è avara ’e sentimente ... ’e cose belle ...
pirciò facimmancella meno amara:
parlammo ancora ’e ammore, ’e cielo ... ’e stelle!»
Facimmele campà, sentite a mme,
chesti speranze ca murì nun vonno ...
’A vita, nfunno nfunno, ’o ssaje che d’è?
’A vita… è nu suonno ’int’a nu suonno!
Nessun commento:
Posta un commento