Mamma mia
Di Eduardo De Filippo
Mamma mia, te tengo attuorno
d’ ‘a matina nfin’ a' sera;
vierno pare primmavera,
mò ca staje sempre cu me.
Si fa viento tu me parle,
mmiez’ ‘o mare sento: “Figlio!”.
Si me serve nu cunziglio,
dint’ ‘o scuro viene tu.
Mamma mia, mamma mia bella…
Quanta vote penzo a quanno,
se pò dì ca dint’ a n’anno,
ce vedevemo sì e no!
Giuvinotto me sentevo
capuzziello, preputente…
Te so' figlio overamente
mo ca nun te tengo cchiù.
Opera pittorica di Gennaro Sansone
